أحمد فلوكس يهاجم هاني شاكر والفنانين بعد نعي مصطفى حفناوي: «كفاية متاجرة»

انفعل الفنان أحمد فلوكس على الفنانين الناعيين للإنفلونسر مصطفى حفناوي، الذي رحل عن عالمنا، الاثنين، عن عمر ناهز الـ٢٥ عامًا، موجهًا الاتهامات لهم واصفًا موقفهم بـ«المتاجرة بالبني آدمين».

وتساءل فلوكس حول أسباب تجاهل العاملين بالوسط الفني، لرغبة الشاب الراحل في التمثيل منذ سنوات، والامتناع عن تقديم فرصة فنية جيدة، مشيدًا بموقف الفنان تامر حسني وزيارته لـ«حفناوي» قبل وفاته بأيام.

وقال «فلوكس» عبر «انستجرام»: «أنا ماعرفش مصطفى، لكن متابعه من أسبوع وأنا في بلد ثانية، ماحدش زاره إلا تامر حسني لأنه رجل، دلوقتي كله الله يرحمه بما فيهم الأستاذ هاني شاكر، كفاية متاجرة بالبني آدمين، إيه دا؟.. دلوقتي الكل فاكره هو الأستاذ تامر النقيب ولا أنت!».

وتابع: «الفنانون والفنانات والمنتجون كنتم فين وهو يوتيوبر عايز يمثل ماخلتهوش يمثل ولا يبقى فنان ليه؟، ولا لما مات افتكرتوه، طيب مش أنتم زعلانين عليه؟، أنا بطالب أن كل اللي كتب (ربنا يرحمه) يروح يبني له جامع باسمه، إحنا في زمن غريب، أنا عشان أبويا علمني مش عايز أغلط في حد، دلوقتي بتنعوه بعد ما مات، أهو مات بتأخدوا لقطة على واحد ميت، ياريت الكورونا كانت علمتكم حاجه».

وكان «حفناوي» شعر بألم في المعدة وتم تشخيص حالته على أنها مشاكل بالقولون، وللتأكد من الأسباب طالبه الأطباء بالخضوع لأشعة وقبل إجرائها فقد الوعي ومع إلحاح الأصدقاء بإجراء إشاعة مقطعية تبين أنه مصاب بجلطة في الجانب الأيسر من المخ، حسب رواية صديقه المقرب الإنفلونسر عمرو راضي، وظل أيام فاقدًا للوعي حتى توفي، وشيعت جنازته بمقابر العائلة بمركز الصف بمحافظة الجيزة.